Bieni‐Motion

Ämmitaler Krimi

Wärti Froue u Manne

Färn am 26. Apriu hei d’Imker vo dr Umgäbig Zäziwiu e massivi Bieni‐Vergiftig a 23 Bienistäng mit 172 Vöuker feschtgsteut. Hunderttuusigi Bieni sy vernichtet worde.
Me het intensiv nach de Ursache gsuecht.

D’Staatsawautschaft het dr Sach aber nid wöue nachegah, drum het me mit Hiuf vomne Aawaut a Beschwärde iigreicht. D’Imker, mit dr Ungerstützig vom Bieni­Gsundheitsdienscht, hei nid ufgäh. 

Ersch bire zwöite Ungersuechig vo vergiftete Bieni und Pflanze, wome in Dütschland het la mache, isch de ds hochgiftige FIPRONIL feschtgsteut worde. Das Insektizid isch ir Schwyz nie zueglah gsi. 

D’Imkerinne u Imker hei i dr länge Zyt, bis ds tödliche Gift isch feschtgsteut worde, viu Schade u Arbeit treit u ertreit.
Ohni si wäri dä Skandau nie uufdeckt worde. U das isch nume där Isbärg vor Gschicht. 

  • U dir, Herr Regierigsrat Rickenbacher, heit das Härestah u Uushaute vo de Imkerinne u Imker i dr Antwort zu dr Motion mit keim Wort erwähnt u gwürdigt. Schad.

I bi mit em Aatrag vo dr Regierig bezüglech de Pünkt 1, 2 u 3 iiverstande u wett öich uuffordere, dene Pünkt au so zuezstimme. Mir bruche dringend di Massnahme.

Am Punkt 4 wetti feschthaute, tues aber ines Poschtulat umwandle.

Wärti Landwirtschaftstätigi, Nutzer und Ungerstützer

Ds wou wichtigschte Nutztier füre Mönsch, für d’Buurerei u für d’Erhautig vor Arteviufaut isch z’Honigbiendli. Näbscht em Wachs u em Honigertrag isch z’Bieni a dr natürleche Befruchtig vo Pflanze entscheidend beteiliget.

Di grösstmöglechi Ernährigssouveränität hanget auso zum grosse Teil ou vo üsem Honigbieni ab. Si ghöre aber ou zu de empfindlichschte Läbewese. Ds Bienivouk aus sehr sensible Organismus isch dr Landwirtschaft, mit ihrne maschinegrächte Monokulture u em Iisatz vo Peschtizide schutzlos uusgliferet.

Lokal, national u wäutwyt brichte Bienihauter über immer grösseri Schwirigkeite. Si sy i dr Saison täglech mit ihrer aaspruchsvolle Arbeit bi de Bieni. Si sy gliichzitig Liebhaber, Hauter, Pfleger u Forscher. Ohni si gäbs ke Honigbieni u ds Resultat chöit ir öich uusmale.
Wichtiger auso aus ds Bundesgäud für d’Exischtenzsicherig vo dr Landwirtschaft si d’Bieni u d’Bienihauter.
Rund 30'000 Vöuker gits im Kanton Bärn. We mir für jedes Vouk z.B. zwänzg Franke a Hauter zuespräche, z.B. uszaut übere Beiiinspäkter, wäre das 600'000 Franke im Jahr.
Isch hie im Grossrat je mit so wenig Gäud so sinnvou inveschtiert worde? Auso, stimmed em 4. Punkt aus Poschtulat zue! Für ihri grossi u unentbehrlechi Arbeit danke ig de Imkerinne u Imker, de Bieni-Vereine u de Verantwortleche vo ganzem Härze.

Schlusswort

U we dir z’nächschte Mau es Bieni gseht, de dänket drah, dass e Grossteil vo de Nahrigsmittu wo mer zuenis näme, entscheidend vo dr Insektebeschtäubig abhanget. Es handlet sich derbi umne entscheidendi Ökosystem-Dienschtleistig.

E Landwirtschaft, wo ds’Überläbe vo de Bieni gfährdet, het kei Berechtigung meh, wiu si ihres eigete Ziu verunmöglecht, nämlech d’Produktion vo gsunde Läbesmittu i gnüegender Mengi.
Bieni sy auso dr effiziäntischt u koschtegünschtigscht Seismograph, wo aazeigt, wies mit üsne exischtenzielle Läbesgrundlage schteit.
Geits de Bieni, wie zur Zyt, immer schlächter, näme ou d’Ressource fürne langfrischtigi u gsungi Läbesmittuproduktion ab.
Aus Alternative zu de Bieni bliibt ja ou no Syngenta oder Monsanto. Das bringt Gäud u isch wirtschaftsfründlech, denken ein paar vielleicht. Ja, aber nume kurzfrischtig; wiu d’Reparaturchoschte heit dir ja nid mit iiberächnet. D’Imkerinne u Imker diräkt z’ungerschtütze isch aber langfrischtig die effiziäntischsti u wou wichtigschti Wirtschaftsförderig überhoupt.

I danke für öires Ja!